“செவ்வாயோட ஆதிக்கத்துல 2025 பொறக்கறதனால சட்டம் ஒழுங்கு சீராகுமாம். காவல்துறை, ராணுவத்தின் கை ஓங்குமாம். தீவிரவாதிகள் ஒடுங்கிப் போவாங்களாம்”.
அடேய், ஆட்டுக் குட்டி, சேக்கிழாரு! இனி சட்டம் ஒழுங்கு கெட்டுப் போச்சுன்னு முதல்வர் மேலப் பாயாதீங்கப்பா. செவ்வாய வெறட்டுனாதான் வர்ற வருசம் ஒங்களுக்கு அரசியல் பொழப்பாவது ஓடும். மொதல்ல அதுக்கான வேலையப் பாருங்கப்பா.
ஓ! செருப்ப கழட்டிட்டு, சாட்டையால அடிச்சுகிட்டா செவ்வாய் ஓடிடும்னு ஆக்ஸ்போர்டுல சொல்லிக் கொடுத்தாங்களோ? இருக்கும்! இருக்கும்!
அப்புறம் முதல்வர் கிட்ட எனக்கு ஒரு ரிக்வெஸ்ட். நீங்க செய்ய வேண்டிய வேலைய செவ்வாயே செஞ்சிடறதால, ஸ்டாலின் சார், யூ டேக் ரெஸ்ட் சார்.
ஒருவேளை சட்டம் ஒழுங்கு எங்கயாச்சும் கெட்டுப் போச்சுன்னா, டூட்டிய சரியாப் பாக்காத செவ்வாய் மேல ஒரு கேஸப் போடுங்க. என்ன நான் சொல்றது சரிதானே?
***
“பிரிந்த சகோதரர்கள் ஒன்று சேர்வார்களாம்”.
செவ்வாயால சேருவாங்கன்னா, இதுக்கு முன்னாடி பிரிஞ்சது யாரால? அடேய்! ஜோதிடப் பசங்களா, சொத்துச் சண்டை இருக்கிற வரைக்கும் சகோதரச் சண்டை நிக்காதுடா. அவிங்க பிரிஞ்சுதான்டா கெடப்பாங்க. ஒங்க ஒன்பது கெரகமும் ஒச்சத்துல வந்தாலும்கூட நம்ம சகோதரர்கள ஒட்ட வைக்க முடியாதுடா. அது சொத்துடமையோட கூடப்பொறந்த பண்புடா. சொத்துடமை இருக்கிற வரைக்கும் ஓயாதுடா இந்தச் சண்டை.
அப்புறம் "செவ்வாயோட ஆதிக்கத்துல பூமி வெலை ஒசருமாம்..”
ஏற்கனவே ஏழை பாழைங்க பிளாட்டு வாங்கி வீடு கட்ட முடியலடா. அந்த செவ்வாய்கிட்ட சொல்லி ரியல் எஸ்டேட் புரோக்கர் பசங்கள கொஞ்சம் அடக்கி வாசிக்கச் சொல்லுங்கடா.
“காடுகள் எல்லாம் செழிப்படையுமாம்...கிளி, மயில் பட்சிகளின் எண்ணிக்கை கூடுமாம்".
கேஸ் அடுப்பு, கான்கிரீட் வீடு, தகரக் கொட்டாய், டிராக்டர் கலப்பைகளின் தயவால எங்க காடுகள் எல்லாம் செவ்வாயோட பார்வை இல்லாமலேயே செழித்து வளர்ந்து நிக்குதுடா.
காடுகள் செழித்ததால் மயில்கள் மட்டுமா பன்றிகள், குரங்குகள்கூட பெருகிவிட்டன. இதனால் வேளாண் பயிர்கள் நாசமாகின்றன. தெரியுமா உனக்கு?
இதெல்லாம் நாட்டு நடப்புடா. அதுக்கு எதுக்குடா 12 கட்டம்?
“லக்னத்தின் மீது அமர்ந்திருக்க குரு பகவான் பார்ப்பதால ஆன்மீகமும், தெய்வீகமும் வளருமாம். சந்திரனுக்குப் பக்கத்தில் கேது இருப்பதால கோவில் கும்பாபிஷேகம் அதிகம் நடக்குமாம்… மலை கோவில்களுக்குப் பாதை அமைக்கப்படுமாம்"
அடிச்சு வுடுறான் பாருங்களேன். இவன் தன்னம்பிக்கைய உண்மையிலேயே பாராட்ட வேண்டும். துன்பங்களும் துயரங்களும் பெருகப் பெருக, ஆன்மீகமும் தெய்வீகமும் வளரத்தான் செய்யும். அதையொட்டி கோயில்கள் பெருகத்தான் செய்யும். கும்பாபிஷேகமும் நடைபெறத்தான் செய்யும். கோவிலுக்குப் பாதை போடத்தான் செய்வார்கள்.
அது எப்படிடா வருஷா வருஷம் கிரகங்கள் எடத்தை மாத்திக்கிட்டே இருக்கு. ஆனா நீங்க சொல்ற இந்த ஆன்மீகப் பலன்கள் மட்டும் எப்பவும் மாறவே மாட்டேங்குது?
சரி! இந்த ஆன்மீகத்தைக் குறைப்பதற்கு எந்த கிரகமும் கிடையாதா? கொஞ்சம் கருணை காட்டி ஒரு கெரகத்தையாவது எத்தியிஸ்ட் பக்கம் பார்வையைத்
திருப்பச் சொல்லக் கூடாதா? நாங்களும் கத்தி கத்திப் பார்த்துட்டோம். ஆன்மீகம் கொறைஞ்சதா தெரியல.
அட்லீஸ்ட் 2026 லாவது, ஒரே ஒரு வருசத்துக்கு மட்டும் இந்த ஒம்பது மெயின் ரோடு பார்ட்டிங்களுக்கு ஒர்க் லோடு ஜாஸ்தின்னா, இந்த ராகு, கேது அப்ரன்டிஸ்ங்களையாவது எங்களப் பார்க்கச் சொல்லுங்கப்பா. நாங்க எவ்ளோ நாளைக்குத்தான் பெரியாருக்காகக் காத்துக் கிட்டுக் கெடக்கறது?
அப்புறம், "சாலை வசதி பெருகுமாம். ஆறு வழிப் பாதை எட்டு வழிப் பாதை எல்லாம் புதுசா வருமாம்”
சென்னை பெங்களூர் எக்ஸ்பிரஸ் ஹைவே முடியப் போறத எவ்ளோ நாசுக்காகச் சொருவுறான் பாருங்க.
“சுக்கிரன் சனி பகவான் வீட்ல இருப்பதனால நிலக்கரிச் சுரங்கம் மூழ்குமாம்”.
இந்தியாவுல ஜார்கண்ட், ஒடிசா, சத்தீஸ்கர், மேற்குவங்கம், மத்திய பிரதேசம் உள்ளிட்ட 8 மாநிலங்களில், நெய்வேலி உள்ளிட்ட 352 நிலக்கரிச் சுரங்கங்கள் இருக்கு. இதுல எந்தெந்த சுரங்கம் மூழ்கும்ன்னு சொல்லிட்டா நாங்க உஷாராயிடுவோமில்ல. குத்து மதிப்பா சொன்னா எப்படி? அப்ப, ஜோதிடம் துல்லியமானதுன்னு சொல்றதெல்லாம் பொய்யா கோபால்?
"செவ்வாய் நீசமாகி நிற்பதனால தினசரி மற்றும் வார பத்திரிகைகளின் விற்பனையை உயர்த்தப் பாடுபட வேண்டி இருக்குமாம்".
செவ்வாய் நீசமாக இருப்பதனால் தினசரி மற்றும் வாரப் பத்திரிகைகளின் மவுசு கொறையல ராசா. வாட்ஸ்அப், பேஸ்புக், டிவிட்டர், இன்ஸ்டாகிராம், யூடியூபு, கூகுள் எல்லாம் சுத்தறதனால வந்த வெனை இது. வேணும்னா அவங்களோடு, செவ்வாயைப் பேச்சு வார்த்தை நடத்தச் சொல்லு. சர்குலேஷன கூடுறதுக்கு ஏதாவது சலுகை காட்டுவாங்க.
“ஆடு, மாடு உள்ளிட்ட கால்நடைகள் பெருகுமாம். பால் உற்பத்தி அதிகரிக்குமாம்”
இது உண்மைதானே? அசைவப் பிரியர்கள் அதிகரித்து வருவதால காளை மாடுகளும், ஆடுகளும் பெருகித்தானே ஆகணும். பால் கறந்தாதான் வீட்டில் அடுப்பு எரியும் என்று நிலையில் விவசாயி இருக்கிறதனால பால் உற்பத்தியும் அதிகமாகும்தானே? இதுக்கு செவ்வாய் எங்க இருந்தா என்னடா? நாங்க எங்க இருக்கோங்கிறதுதான்டா முக்கியம்!
அப்புறம், "வாகன உற்பத்தி உயரும், பேட்டரி கார், சோலார் பயன்பாடு அதிகரிக்கும்... கம்ப்யூட்டர் மற்றும் ஏ.ஐ துறைகள் வளர்ச்சி அடையும். ஷேர் மார்க்கெட் ஏறி இறங்கும். தங்கம் விலை உயரும்".
என அள்ளி வுடுறானுங்க.
பொருளாதாரம் படிச்சவனே இதெல்லாம் சொல்றானே? கைநாட்டுப் பசங்க, நீங்க எதுக்குடா கட்டத்தத் தூக்கிகிட்டு இதில் எல்லாம் மூக்க நொழைக்கிறீங்க?
இப்படி இன்னும் பலப் பல, 26.12.2024, இந்து தமிழ் திசை நாளேடு, ஆனந்த ஜோதி பக்கத்தில், 2025 ஆங்கிலப் புத்தாண்டு ராசி பலன் பற்றி ஜோதிஷ பூஷன் வேங்கடசுப்பிரமணியனின் பொதுப் பலன்கள் எனும் புருடாக்கள் இவை.
இவை தவிர 12 ராசிக்காரர்களுக்கும் தனித்தனி கணிப்புகள்.
நமது மக்கள் அன்றாடம் சந்திக்கும் பிரச்சனைகளை, அரசியல், பொருளாதார, பண்பாட்டுத் தளங்களில் நிகழும் சமூக நடப்புகளை ஓரளவுக்குப் புரிந்து கொண்டு, அவற்றை ராசிகளோடு பொருத்தி, கட்டத்தை வைத்து கலந்து கட்டி அடிப்பது ஜோதிடக்காரர்களுக்குக் கைவந்த கலை.
ஜோதிடம் மிகவும் துல்லியமானது என்று இவர்கள் கதை அளப்பார்கள். ஆனால் நாலு ஜோதிடர்களின் கணிப்புகளை எடுத்து ஒப்பிட்டுப் பார்த்தாலே இவர்கள் அடிப்பது கப்சா என்பது அம்பலமாகும். அதேபோல கடந்த ஆண்டுகளின் ராசி பலன்களையும், இந்த ஆண்டு ராசி பலனையும் ஒப்பிட்டுப் பாருங்கள். கப்சா இன்னும் உறுதியாகும். (கட்டுரையின் விரிவு கருதி நான் இதற்குள் செல்லவில்லை).
ராசிபலன் பகுதியில், நம்ம ராசிக்கான பலனை மட்டும்தானே நாம் பார்க்கிறோம். மத்ததையும் படிச்சாதானே ஒரே மேட்டரை வரிசை மாத்தி, வார்த்தை மாத்தி போட்டிருக்கானுங்க என்பதே தெரியும். அதை ஒருபோதும் நாம் செய்ய மாட்டோம் என்பதை அவன் தெரிந்து வைத்திருக்கிறான்.
ஜோதிடத்தால் பத்திரிகைகளின் பக்கங்கள் நிறைகின்றன. தொலைக் காட்சிகளில் நேரங்கள் கழிகின்றன. மொத்தத்தில் ஜோதிடர்களுக்கும் ஊடகங்களுக்கும் பைகள் நிறைகின்றன. நாமோ கைநாட்டு ஜோதிடக்காரனுக்கு முன்னால் வாய் பொத்தி மௌனியாய் நிற்கின்றோம்.
பசியாற, தாகம் போக்க புல்வெளிகளை, நீர் நிலைகளை நாடும் அப்பாவி மாடுகளும், மான்களும் கொடிய விலங்குகளிடம் சிக்கித் தவிப்பதைப் போல, துன்பங்களாலும், துயரங்களாலும் சிக்கி மீள வழி தெரியாமல் முழிக்கும் நம்மை ஜோதிடம் கவ்விக் கொள்கிறது.
ஊரான்
தொடர்புடைய பதிவுகள்
.jpeg)
.jpeg)
.jpeg)