ஊசிப்போன ஊறுகாய்!

வரிக்கு மேல வரிய போடுற அரசாங்கம்

கடந்த வெள்ளி அன்று நகராட்சி ஊழியர்கள் வீடு தேடி வந்து. வீட்டு வரி, தண்ணீர் வரி கட்டச் சொல்லி விவரச் சீட்டுக் கொடுத்தார்கள். தாமதிக்கத் தாமதிக்கத் தண்டம் கட்ட வேண்டி வரும் என்று அவர்கள் அச்சுறுத்தியதால், அன்றே இணையவழியில் முயன்றேன், ஆனால், அரசு அலுவலகங்களில் அடுத்த மேசைக்கு நகர மறுக்கும் மனுக்களைப் போல, இங்கே இணையமும் அடுத்தப் பக்கத்திற்குப் போக மறுத்தது. 

மறுநாள் காலை அலுவலகத்தில் கணினி காட்டியத் தொகையைக் கட்டிவிட்டு இரசீதைப் பார்த்தேன். ஓராண்டின் இரு தவணைகளும் பாக்கி, அதுவும் காலம் கடந்து கட்டியதால் ரூ.120 தண்டம், அதோடு தாமதத்திற்குக் கூடுதலாக ஒரு சதவீதம் என ரூ.15 தண்ட வட்டி ஆக மொத்தம் ரூ.135. 

கட்டுறதே 'வீட்டு வரி', இதுல தாமதத்துக்குத் தண்டம் வேற, சரி. அதுக்கு மேல ஒரு சதவீதம் வட்டி எதுக்கு?  இது என்ன 'வரிக்கு மேல வரியை போடுற' கதையா இருக்கு? எல்லாம் ஊறுகா மாமியோட 'ட்ரெயினிங்' போல?

சொற்ப ஓய்வூதியத்தில் காலம் தள்ளுவோருக்கு இது பெரிய தொகை என்பதை என் முகம் காசாளருக்குக் காட்டிவிட்டது போல! "தவணைத் தேதிக்குள் வரியை செலுத்தினால், 10 சதவீதம் கட்டணத்தில் சலுகை" என்றார். மிச்சப்படுத்த வேண்டிய அளவுக்கு தண்டமாகச் செலுத்துகிறோமே என்ற ஏமாற்றத்துடன், "தவணைத் தேதிக்கு முன்னரே ஒரு குறுஞ்செய்தி அனுப்பலாமே?" என்று எனது ஆதங்கத்தை மட்டும் அவரிடம் வெளிப்படுத்திவிட்டு வெளியே வந்தேன்.

"இதுக்கே அலுத்துக்கிட்டா எப்பூடி? கார் வாங்கும் போது சாலையில் நுழைவதற்கு முன்பே ரோடு டேக்ஸ் கட்றோம், அப்புறம் ரோடுல ஓடும் போதெல்லாம் டோல் டேக்ஸ் கட்றோம். இது ஒரு மாட்டை ரெண்டு முறை தோலுரிக்கறதா தெரியலையா உங்களுக்கு?" என கார்காரங்க விம்முறது என் காதுல கேட்குது. என்ன செய்ய?

ஊசிப்போன ஊறுகாயத் தூக்கி வீசாதவரைக்கும் ஊறுகளை அனுபவிச்சுத்தானே ஆகணும்?

ஊரான்

40 ஆண்டுகளுக்கு முந்தைய மகஇக பாடல்

வரி...வரி...வரி

வரிக்கு மேல வரியப் போடுற அரசாங்கம்... 

நம்ம, வாழ்வக்கெடுத்து வறுமையாக்குது அரசாங்கம்...      இந்த அரசாங்கம் (2)

(வரிக்கு மேல...)

தாத்தாப் பாட்டி முதல் பொம்பள ஆம்பள போடுற வெத்தல பாக்குக்கு வரி!

காஞ்சத் தொண்டைய நனையக் குடிக்கிற 

காப்பிக்கும் போடுறான் விற்பனை வரி!

காலையில் எழுந்துக் கஞ்சிக் குடிக்கிற பானைக்கும் போடுகிறான் பானை வரி!

சினிமா டிராமா காட்சிக்குப் போனா

அங்கேயும் போடுறேன் கேளிக்கை வரி!

பார்த்தா வரி... சிரிச்சா வரி... கேட்டா வரி (வரிக்கு மேல...)

கட்டாதப் பணத்துக்குப் பீசப் புடுங்குறான் 

அங்கே இருக்குது மின்சார வரி!

ஓட்டச் குடிசையில் கதவை ஒடைக்கிறான் அங்கே போடுறது வீட்டு வரி!

கொழாயத் தொறந்தாத் தண்ணியும் வராது

அதுக்கும் போடுறான் தண்ணி வரி!

குடிசையில் எரியும் சிமினி விளக்குக்கு

ஊத்துற சீமெண்ணைக்கும் போடுறான் வரி!

வீட்டு வரி... தண்ணீ வரி... சீமெண்ணெய் வரி...(வரிக்கு மேல...)

வெளைஞ்ச நெல்லையே கொறைஞ்ச வெலைக்காகக்

கொள்முதல் செய்வது தானிய வரி! 

கஷ்ட ஜீவனம் நடத்தும் தொழிலாளி விவசாயிக் கட்டுற துணிக்கு வரி!

டீக்கடை சைக்கிள் கடை பெட்டிக் கடை மளிகைக் கடை 

அத்தனைக்கும் போடுறான் தொழில் வரி!

திருடர்கள் போக்கிரிகள் கொள்ளைக்காரர்கள் 

கோர்ட்டில் கட்டுவது குண்டர்கள் வரி!

வரவுக்கு வரி... தொழிலுக்கு வரி... கோர்ட்டுக்கு வரி...

நபர் 2: வர்ற காலத்துல இன்னும் எதெதுக்கெல்லாம் வரி போடப் போறானுங்களோ?

நபர் 1: சொல்றேன் கேளு!

பொஞ்சாதிப் புரசன் ஒண்ணாகப் போனா அதுக்கும் போடுவான் தம்பதி வரி!

நாட்டில்... பிறக்கிற ஒவ்வொரு குழந்தைக்கு எல்லாம் 

அவனும் போடுவான் குழந்தை வரி!

விலைவாசி ஏற்றத்தாலப் பட்டினியாக் கிடந்தா

அதுக்கும் போடுவான் பட்டினி வரி! 

பெத்தக் குழந்தைக்குத் தாய்ப்பால் கொடுத்தா 

அதுக்கும் போடுவான் தாய்ப்பால் வரி!

குனிஞ்சா வரி... நின்னா வரி... நெளிஞ்சா வரி...

(வரிக்கு மேல...)

***