ஊர&#3006;ன&#3021;

பிற்படுத்தப் பட்டோருக்கான இடஒதுக்கீடு: அம்பேத்கர் துரோகம் இழைத்தாரா? - 5

பிற்பட்டோர் இடஒதுக்கீடு: பிராமண மாணவர்களுக்காக கவலைப்பட்ட மொரார்ஜி தேசாய்! - 6

OBC இட ஒதுக்கீடு: ஒற்றை நாடி மனிதனின் ஓயாத உழைப்பு! - 7

மண்டல் குழுவின் பரிந்துரைகள்! - 8

பிற்படுத்தப்பட்டோரின் எதிராளிகள் யார்? - 9

ஏழைகளுக்கு இட ஒதுக்கீடு என்பது சரியா? - 10

இந்தியாவில் இட ஒதுக்கீடு பெறுபவர்கள் யார்? யார்? -11

வகுப்புவாரியிலிருந்து சாதிவாரியை நோக்கி.. - 13

அலுவலகங்களில் நிலவும் சாதிய முரண்கள்! - 14

சமூக நீதி: உங்களுக்கானத் தலைவர்கள் யார்? - 15

முதலைக் கண்ணீர்! - 2

திருவண்ணாமலை, மத்தாளங்குளத் தெரு முனையில் கம்பி வலைக்குள் பெரியார். வலப்பக்கம் ஸ்ரீ கெங்கையம்மன். அதற்கு அருகிலே கிறிஸ்தவ தேவாலயம்.

சிலைகளுக்கு வலை போடலாம், ஆனால் சிந்தனையைச் சிறைப்படுத்திவிட முடியுமோ? அதனால்தானோ என்னவோ, கிழவன் அமர்ந்தாலே அலறுகிறது ஒரு கூட்டம். சிலைகளுக்குப் 'பவர்' உண்டா? நம்புகிறேன் நானும் இந்தக் கிழவனைக் கண்ட பிறகு.

பேருந்துத் திரையில் விஜயகாந்தின் 'பெரியமருது'வைப் பார்த்துக் கொண்டே தண்டராம்பட்டைத் தாண்டி விட்டேன். திரையில் ஒரு கண்ணுமாக, வெளியில் ஒரு கண்ணுமாக பார்வை அலைபாய, திரையில் மகேஷ் ஆனந்த், ரஞ்சிதாவை கொத்திக் குதரத் துரத்த, தனது 'கற்பைக்' காக்க அவள் மாடியிலிருந்து விழுந்து மாண்டு போகிறாள். வெளியில், கிரானைட் காடையர்களால் கொடூரமாய் சிதைக்கப்பட்டு வீழ்ந்து கிடந்தன சீரிளம் குன்றுகள்.

ஃபெஞ்சலால் உலகின் கவனத்தை ஈர்த்த சாத்தனூர் அணையை நோக்கிப் பேருந்து விரைந்தது. 'காரியத்துக்கு' என்று சொல்லி கட்டணம் இன்றி உள்ளே சென்றேன். பைரவனைச் சுமந்த கலைப்போ என்னவோ, பைரவனின் வாகனங்கள் சில சாலையில் படுத்துக் கிடந்தன.

வழக்கமாகக் 'காரியம்' நடக்கும் ஒன்பதுகண் பாலத்திற்கு அருகில் ஐயர் சம்மணமிட்டு அவரது வேலைகளைத் தொடங்கியிருந்தார். உறவுகள் ஒவ்வொருவராக வரத் தொடங்கினர். அதற்குள், தமிழ்நாட்டின் அழகிய அணையை ஒரு சுற்றுப் பார்த்து வரலாம் என்று உறவுப் பேரனோடு புறப்பட்டேன்.

முதலைப் பண்ணைக்குப் போகும் வழியில் சிற்றோடையில் ஊற்றுநீர் ஓடிக்கொண்டிருந்தது. இடப்பக்கம் அடர்ந்த மரங்கள். மரங்களுக்கு அடியில் ஆட்கள் அடிக்கடி சென்று வரும் பாதைத் தடம். எட்டிப் பார்த்தேன். அங்கே மதுப் பிரியர்களின் கண்ணாடிக் காடுகள்.

பார்வையைத் திருப்பி நேரே சென்று பண்ணைக்குள் நுழைந்தோம். ஆசியாவிலேயே பெரிய பண்ணை. 500 இருந்த இடத்தில் இன்று 300 மட்டுமே. ஆறுகளிலும் அணைகளிலும் சுதந்திரமாய் உலாவும் முதலைகள், பாவம் இங்கே மக்களை மகிழ்விக்கச் சிறு சிறு குட்டைகளில் கைதிகளாய்.

வஞ்சக நெஞ்சுடன் நாம் வடிக்கும் போலிக் கண்ணீரை, முதலைக் கண்ணீர் என்று எவன்தான் சொன்னானோ? ஆனால் இங்கே முதலைகளின் நிஜக் கண்ணீரைக் காண முடிந்தது.

கொட்டடிக்குள், சிறு தொட்டிகளில் வண்ண மீன்கள், கண்ணாடிச் சுவர்களில் முட்டி மோதி மூச்சு விட்டுக் கொண்டிருந்தன.

கூரைகளுக்குக் கீழே, கம்பி வலைகளுக்குள் பச்சைக்கிளிகளும், பலவண்ணப் பறவைகளும், மாடப் புறாக்களும், மயில்களும், முயல்களும் என வாயில்லா ஜீவன்கள் அடைக்கப்பட்டு முடக்கப்பட்டிருந்தன.

சுதந்திரமாய் நீந்தி, பறந்து, ஓடி ஆடி உல்லாசமாய் வாழ வேண்டிய இடத்தில், சிறைக் கைதிகளாய் நம் கண்முன்னே. சிறைக்குள் வாடுவோரின் கண்ணீரைக் கண்டு இரசிக்கிறோமே, நாம் 'சேடிஸ்டுகளா' என்ற எண்ணம் ஒரு பக்கம் என்னைக் குடைய, அணையின் பதினோருகண் நீர்ப்போக்கியை நோக்கி மெதுவாய் நடந்தோம்.

பசி இல்லை என்றாலும், சுற்றுலாத் தளங்களில் பார்த்ததை எல்லாம் வாங்கித் தின்ன நாம் பழகிக் கொண்டதால், ஐஸ்கிரீம், பஜ்ஜி, நொறுக்குத் தீனிகளுக்குப் பஞ்சம் இல்லை. பஜ்ஜியை கையில் வாங்கிய அடுத்த நொடியே, தாவிப் பாய்ந்து பறித்துச் சென்றது வானரம் ஒன்று. இது அவர்களின் தேசமன்றோ?

காரப்பட்டைப் புரட்டிப் போட்டு, கடலூரை மூழ்கடித்த லட்சம் கனஅடி எப்படி இருக்கும் என்பதன் சுவடுகள் மட்டுமே அங்கே தென்பட்டன. பதினோருகண்

நீர் போக்குப் பாதையில், சிறு குன்றுகளை ஏறி மிதித்து, மரங்களை எல்லாம் வளைத்து நெளித்து, பாய்ந்து சென்ற பெருவெள்ளத் தடங்கள் பளிச்செனத் தெரிந்தன. நாங்கள் பார்த்தபோது வெளியேறிய 2000 கனஅடியே பேரிரைச்சலோடு சீறிப்பாய்ந்தது. அப்படியானால் ஒரு லட்சத்து எழுபதாயிரம் கன அடி எப்படி இருந்திருக்கும்? நினைக்கையிலே உடல் சிலிர்க்கிறது.

பிற்பகல் 2 மணி. அணையின் பரந்த நீர் பரப்பைப் பார்த்தவாறு கீழே இறங்கினோம். மீனவர்கள் மேலே ஏறிக் கொண்டிருந்தார்கள். "என்ன மீனுக்கா?" என்று வினவிய போது, "ஆம், நாளை காலைதான் திரும்புவோம்" என்று கடந்து சென்றனர்.

அணையின் காட்சிகள் இங்கு கவர்ச்சிக் காட்டியதால், நாங்களும் சில இடங்களில் மயங்கினோம். கைபேசியில் அவற்றை உள்ளடக்கியவாறு பேசிக்கொண்டே வந்தபோது, திடீரென, "நீங்கள் எத்தியிஸ்டா?" என்று கேட்டான் பேரன். "ஆம்" என்றேன். "நானும்தான்" என்றான். எனக்குள் ஒரு இளமைத் துள்ளல். 'அடடா, நம்மைப் போல் ஒருவன்' என்ற பெருமை என்னுள்.

50 ஆண்டு இடைவெளியில்,

இருவருமே ஒரே பருவத்தில், ஆம், பள்ளிப் பருவத்தில், பிறரின் தூண்டுதல் ஏதுமின்றி தானாகவே "எத்தியிஸ்ட்" ஆன ஒற்றுமை ஒன்று போதாதா பெருமை கொள்ள? நம்பிக்கைகளை விதைக்காமல் இருந்தால் நாமும் இங்கு 'நார்வே'க்கள்தானே?

(எத்தியிஸ்ட் - atheist)- நாத்திகன்)

"ஐயர் வந்தார், அள்ளிச் சென்றார்" என்பதற்கிணங்க 'காரிய' வேலைகள் கனஜோராய் நடந்து கொண்டிருந்தன. ஆண்கள் முகம் மழித்து, காசு பணம் வேட்டி சேலை என முறையுள்ளவர்கள் சம்பந்தம் கட்ட, கடைசியில் ஆற்று நீரை தலையில் தெளித்து தீட்டுக் கழிக்க, எதுவும் செய்யாதிருந்த என்னைப் பார்த்து "ஏன் நீங்கள் மட்டும் எதுவும் செய்யவில்லை?" என மற்றொரு பேரன் கேட்டான்.

"பிறப்பு, இறப்பு, பெண் பருவம் எய்தல், மாத விடாய், கிரகப்பிரவேசம் என எவ்வளவு முடியுமோ அவ்வளவையும் நமக்குத் தீட்டாக்கி, அதைக் கழிக்க சடங்குகள் சம்பிரதாயங்களைப் புகுத்தி, அன்றே நம்மை மூட நம்பிக்கையில் ஆழ்த்தி உள்ளனர். இவை எல்லாமே புரோகிதர்கள் தங்களுடைய வருமானத்திற்காக ஏற்படுத்திக் கொண்ட ஒரு ஏற்பாடுதானே தவிர, இதனால் கால நேர பண விரயத்தைத் தவிர, நமக்கு ஆவப்போவது ஒன்றுமில்லை என்பதனால், நான் இவற்றை எல்லாம் செய்வதில்லை" என்று எடுத்துச் சொன்னேன்.

கம்பி வலைகளால் சூழப்பட்ட சமுதாயக் கூடத்திற்கு வெளியே, பைரவனின் சில வாகனங்களும், எண்ணற்ற வானரங்களும், ஒரு சில வராகன்களும், தங்கள் வயிற்றுப் பாட்டுக்கு சமுதாயக் கூடத்தைச் சுற்றி வளைக்க, கூரைக்கு உள்ளே சிறைக் கைதிகளாய் நாங்கள், கோழி பிரியாணியுடன் பசியாறினோம்.

இறப்பின் தீட்டைக் கழிக்க சடங்குகள் சம்பிரதாயங்கள் இருக்கு. ஆனால், உறவுகளுக்கிடையில் எழும் பகைமையைப் போக்க அப்படி ஏதேனும் உண்டா என்ற கேள்வி மட்டும் எஞ்சி நிற்க, அவரவர் வந்த திசை நோக்கிப் பயணமானோம்?

முற்றும்

ஊரான்

தொடர்புடைய பதிவு

கத்திரிக்காய் விலை கூட கட்டுமீறல் ஆச்சு! - 1

Wednesday, December 18, 2024

கத்திரிக்காய் விலை கூட கட்டுமீறல் ஆச்சு! - 1

'போலாமா வேணாமா?' என்ற ஊசலாட்டம் ஒரு பக்கம் இருந்த போதும், புறப்பட்டு விட்டேன் காலை ஆறு மணிக்கு. பேருந்தில் கூட்டம் குறைவாகத்தான் இருந்தது. மூன்று சீட்டு இருக்கையில் சன்னல் ஓரத்தில் நான் மட்டுமே.

கழுத்திலும், கைகளிலும் தோல் முடிச்சுகளோடு இருந்த கருத்த நடுத்தர வயதுப் பெண்மணி ஒருவர் ஆற்காட்டில் ஏறினார். பெரும்பாலும் உடலில் தோன்றும் இந்த முடிச்சுகள் தீங்கற்றவை என்றாலும், இத்தகையவர்களை இச்சமூகம் இன்னமும் இழிவாகப் பார்ப்பதனாலோ என்னவோ, இவர்கள் தங்களை தீண்டத்தகாதவர்களைப் போலக் கருதிக்கொண்டு, ஒருவித குற்ற உணர்வுக்கு அவர்கள் ஆளாகிறார்கள் என்பதை நமதருகில் அமரும் போதே நம்மால் உணர முடிகிறது.

ஆரணியில் பலர் இறங்க, அந்த அம்மணியும் இடம் மாறி அமர எனதருகில் பட்டாபட்டி ட்ரவுசர் வெளியே தெரிய, கையில் பையுடன் ஒரு விவசாயி என் அருகில் அமர்ந்தார். உட்காரும்போதுகூட அவர் வேட்டியை கீழே இறக்கி விடவில்லை. மிடுக்கு உடை நடுத்தர வர்க்கம் என்றால் இந்நேரம் முகம் சுளித்திருக்கும்.

மிடுக்கு உடை மனிதர்கள் அருகில் உட்கார்வதற்குக்கூட, அழுக்கு உடை மனிதர்கள் கூச்சைப்படுவதும் ஒரு பக்கம் இருப்பதனால், நான் மிடுக்கும் அழுக்கும் இன்றி சாதாரண உடையில் செல்வதே வழக்கம்.

பேச்சு கொடுத்தேன்.

"எந்த ஊர்?" என்றேன்.

'அத்திமூர்" என்றார்.

"அடடே நம்ம மூதாதையர் ஊராச்சே" என்று அவரோடு மனம் நெருக்கமாச்சு.

"பையில் என்ன?" என்றேன்.

திறந்து காட்டினார். காலிபிளவர், கேரட், கத்திரிக்காய் இருந்தது.

விலை கேட்டேன்.

"கத்தரிக்காய் அரை கிலோ ரூ.30, காலிபிளவர் ஒன்று ரூ.50, கேரட் பரவாயில்லை கிலோ ரூ.30" என்றார்.

விலை உயர்வைக்கூட, 'பரவாயில்லை' என்று திருப்திப் பட்டுக் கொள்கிற நிலைக்குத் மக்கள் தள்ளப்பட்டிருக்கிறார்கள்

கத்திரிக்காயைப் பார்த்த போது "அரை கிலோ மாதிரி தெரியலையே?" என்று நான் கேட்டபோது,

"ஆமா, எடை மோசடி, நானும் சத்தம் போட்டுட்டுத்தான் வறேன், காயப் பாருங்க, வதங்கனது, அதனாலதான் அரை கிலோ 30, நல்ல காயினா அரை கிலோ 40" என்றார்.

அன்று (1951),

"அஞ்சு ரூபா மாத்தி... மிச்சமில்ல, காசு மிச்சமில்ல..,

கத்திரிக்கா விலைகூட கட்டுமீறலாச்சி, காலம் மாறிப்போச்சு..."

என்ற "அந்தமான் கைதி" பாடல்

இன்று,

"ஐநூறு ரூபா மாத்தி... மிச்சமில்ல, காசு மிச்சமில்ல" என்றல்லவா பாட வைக்கிறது.

"இதுவாவது பரவாயில்ல, முருங்கக்கா கிலோ 500, அதுவும் கெடைக்கறதில்ல" என்றார். விலையைக் கேட்டவுடன் கொஞ்சம் அதிரத்தான் செய்தது.

"ஏன் இங்கேருந்து வாங்கிட்டுப் போறீங்க, போளூரிலேயே வாங்கிக்கலாமே?" என்று கேட்டதற்கு, அங்க இன்னும் வெல அதிகம்" என்றார்.

"என்னடா, ஒரு கிராமத்துக்காரன், அதுவும் ஒரு சிறு விவசாயி காலிபிளவர் எல்லாம் வாங்கிட்டு போறானே, கிராமத்துல சாதாரணமாகக் கிடைக்கக்கூடிய கத்திரிக்காயைக்கூட வாங்கிட்டுப் போறானே, இவ்வளவு காசு கொடுத்து வேற வாங்கிட்டுப் போறானே?" என்று என்னுள் ஓடிய மன ஓட்டத்தை அவர் புரிந்து கொண்டது போல,

"காசா சேத்து வெச்சி என்ன பண்ணப் போறோம்? சாப்புடுவோம்", என்றபோது எனது எண்ண ஓட்டத்தில் நறுக்கென்று ஊசியால் குத்தியது போல் இருந்தது.

தனது இரண்டு ஏக்கர் நிலத்தில் அண்மையில் அறுவடை செய்த நெல்லை, மூட்டை ரூ.1600 க்கு போட்டுவிட்டு, அவர் ஊர் திரும்பிக் கொண்டிருக்கிறார் என்பதை அவர் மற்றவரோடு கைபேசியில் பேசியிதிலிருந்து புரிந்து கொள்ள முடிந்தது.

அத்திமூரில் வாழ்ந்த எங்களது மூதாதையர், அந்த ஊரில் இன்னமும் இருக்கும் எங்களது உறவினர்கள், இரண்டொரு முறை அந்த ஊருக்கு நான் சென்று வந்தது, அத்திமூர் மலையில் உள்ள கோட்டை, கோட்டையைப் பார்க்க வேண்டும் என்ற எனது விருப்பம், கோட்டையைப் பார்க்க அவர் சென்று வந்தது, ஜமனாமரத்தூர் மலையில் வாழும் மக்களின் வசதி வாய்ப்பு,

அவரது விவசாயம், கழிவறை குளியல் அறை வசதியுடன் விவசாய நிலத்திலேயே வீடு கட்டிக்கொண்டு அவர் வசிப்பது, தனது இரண்டு மகள்களையும் திருமணம் செய்து கொடுத்தது, அண்மையில் பெய்த மழை என அவரோடு பேசிக் கொண்டே சென்றதால் போளூர் வந்ததே தெரியவில்லை.

செய்யாற்றில் ஓரளவு தண்ணீர் ஓடிக் கொண்டிருந்தது. பொங்கல் நெருங்குவதால், சாலையின் இரு புறங்களில் இருந்த சில கான்கிரீட் வீடுகளின் சுவர்களில் ஷாரோன்களும், பூம்புகார்களும் நகரம் நோக்கி வருவோரைக் கவர வெற்றிலை பாக்குடன் இளித்துக் கொண்டிருந்தன.

திருவண்ணாமலையில் இறங்கிய போது, திண்டிவனத்திலிருந்து சாத்தனூர் அணை செல்லும் பேருந்து வந்து நின்றது. பேருந்து உடனே புறப்பட இருந்ததால், காலை சிற்றுண்டிக்கு அவகாசம் இல்லை. பத்து ரூபாய் 'குட்டே'யுடன் பயணத்தைத் தொடர்ந்தேன்.

தொடரும்

ஊரான்

சமூக நீதி: உங்களுக்கானத் தலைவர்கள் யார்? - 15

ஊழியர்களிடையே சாதியப் பாகுபாடு

1980 மற்றும் 1990 களில் 'பெல்' (BHEL) போன்ற பல்வேறு அரசு மற்றும் பொதுத்துறை நிறுவனங்களின் உயர் பொறுப்புகளில் பெரும்பாலும் பார்ப்பனர்களே ஆதிக்கம் செலுத்தி வந்தனர்.

அதன் பிறகு, பதவி மூப்பின் காரணமாகவும், இட ஒதுக்கீட்டின் மூலமாகவும் பட்டியல் சாதிப் பிரிவிலிருந்து ஒரு சிலரும், பிற்படுத்தப்பட்ட வகுப்பைச் சார்ந்த சிலரும் உயர் பொறுப்புகளுக்கு வர முடிந்தது.

உயர் பொறுப்புகளுக்கு வரும் இத்தகைய எவர் ஒருவரும் சாதியைத் துறந்தவர்களும் அல்ல; தீவிர கம்யூனிஸ்டுகளும் அல்ல. அவர்களிடமும் சாதியச் சாயல் இருக்கவே செய்கிறது. அதன் காரணமாக, வேலைக்கு ஆள் எடுக்கும் போதும், ஊழியர்களின் பதவி உயர்வுகளின் போதும், இவர்களும் தங்கள் தங்கள் சாதியினருக்குச் சலுகை காட்டி முன்னுரிமையும் கொடுக்கின்றனர்.

ஓராண்டு 'தொழிற் பழகுநர்' (Apprentice) பயிற்சிக்கு ஆள் எடுக்கும்போதுகூட இந்தச் சாதியச் சாயலைப் பார்க்க முடியும்.

'திறமை' என்ற அளவுகோலை முகாந்திரமாக வைத்துக் கொண்டு, இவர்களே அதற்கானக் கூடுதல் மதிப்பெண்களையும் வழங்கி, முடிந்தவரை எத்தனை பேரை பொதுப் பிரிவில் (Open Category - OC) கொண்டுவர முடியுமோ அதற்கு ஏற்ப, தங்கள் சாதிக்காரர்களுக்கான இவர்களது சலுகை நீளும். இட ஒதுக்கீட்டில் பெறுவது தனி.

பெரியார்

சாதிகளின் தொகுப்பாக இருக்கும் SC, ST மற்றும் OBC வகுப்புகளில்,

இட ஒதுக்கீட்டின் மூலம் வருபவர்களைக்கூட, இந்தத், தொகுப்புகளில் பல்வேறு சாதிகள் உள்ளடங்கி இருப்பதனால், தங்கள் தங்கள் சாதி ஆட்களாகப் பார்த்துத் தேர்வு செய்வதில் அந்தந்தச் சாதிக்காரர்கள் அதிகக் கவனம் செலுத்துகின்றனர்.

எல்லாச் சாதிகளைச் சார்ந்தவர்களும் இதைச் செய்த போதும், பட்டியல் சாதியினர் செய்யும் போது மட்டும், அது மிகப் பெரியக் குற்றமாகப் பிறரால் பார்க்கப்படுகிறது.

பட்டியல் சாதியினர் மீது ஓராயிரம் வன்மங்களை மனதில் வைத்துக் கொண்டே, தனக்கு ஆதாயம் தேவை என்றால், உயர் பதவியில் உள்ள பட்டியல் சாதி அதிகாரிகளுக்கு 'எடுபிடி' வேலை செய்து பதவி உயர்வு, இடமாற்றம் உள்ளிட்ட ஆதாயங்களை அடையும் பிறசாதி காரியவாதிகளும் ஒரு பக்கம் இருக்கத்தான் செய்கின்றனர்.

வேலைக்கு ஆள் எடுக்கும் போதும், ஊழியர்களின் பதவி உயர்வின் போதும், எல்லா அரசு அலுவலகங்களிலும் இது போன்ற சாதி அடிப்படையிலான பாரபட்சம்

தொடர்ந்து நீடிப்பதால் ஊழியர்களுக்கு இடையிலான சாதியக் காழ்ப்பும் அவர்களிடையே வழிந்தோடுகிறது.

இத்தகையப் பாரபட்சம்தான், தமிழ்நாட்டில் உள்ள 'பெல்' (BHEL) போன்ற பொதுத்துறை நிறுவனங்களிலும், தேசியமயமாக்கப்பட்ட வங்கிகளிலும், அஞ்சலகங்களிலும், இரயில்வேயிலும் இன்று வட இந்தியர்கள் ஆதிக்கம் செலுத்த வழி வகுக்கிறது. இங்கே நாம் சாதி அடிப்படையில் பாராபட்சம் பார்க்கிறோம். அங்கே, அவன் வடக்கு தெற்கு என்ற அடிப்படையில் பாரபட்சம் பார்க்கிறான்.

தமிழ்நாட்டில் செயல்படும் மத்திய அரசு அலுவலகங்களில், தமிழ்நாட்டில் உள்ளவர்களுக்கே பெரும்பான்மை இடங்களை ஒதுக்குவதற்கும் நாம் போராட வேண்டி உள்ளது என்பதைத்தான்

மேற்கண்ட வடக்கு தெற்கு பாரபட்சம் நமக்கு உணர்த்துகிறது.

நுழைவுத் தேர்வு இருக்கும் பட்சத்தில், தேர்வுக்கான வினாத்தாள்களை உயர் பதவியில் இருப்பவர்கள், தங்கள் தங்கள் சாதிக்காரர்களுக்கு மட்டும் இரகசியமாகச் சுற்றுக்கு விட்டுத் தங்கள் சாதிக்காரர்களைச் 'சாதிக்க' வைப்பதும் ஒரு பக்கம் நடந்து கொண்டுதான் இருக்கிறது.

எதற்கு இரகசியம், நுழைவுத் தேர்வை நேரடியாகப் பார்த்தே எழுது என்கிறான் வட இந்தியன். இல்லை என்றால் விடைகளையும் அவனே சொல்லி விடுகிறான்.

அவ்வளவுதாங்க 'மெரிட்டு'.

எல்லா அரசு அலுவலகங்களிலும் இப்படித்தான் நடக்கிறது. நேரடிக் கள அனுபவம் என்கிற வகையில் BHEL ஐ இங்கே நான் உதாரணத்திற்காக எடுத்துக் கொண்டிருக்கிறேன்.

***

உங்களுக்கானத் தலைவர்கள் யார்?

ஆலைகளிலும், அரசு அலுவலகங்களிலும் வேலை செய்பவர்களின் எண்ணிக்கை ஒட்டுமொத்தச் சமூகத்தில் மிகச் சொற்பமே. ஆனால், ஓரளவு விவரம் தெரிந்தவர்களாகவும் இருப்பதால் இந்தச் சாதியக் காழ்ப்பை இவர்கள் ஒட்டுமொத்தச் சமூகம் முழுவதற்கும் எடுத்துச் செல்கின்றனர்.

தன் சாதி மக்கள் தரமானக் கல்வியைப் பெறுவதற்கும், அரசு வேலைகளைப் பெறுவதற்கும் படிப்பகங்கள் உள்ளிட்ட வசதி வாய்ப்புகளை ஏற்படுத்திக் கொடுத்து வழிகாட்டுவதற்குப் பதிலாக, பெரும்பாலும் அடுத்த சாதியினர் மீதான வன்மத்தையே இவர்கள் தங்கள் தங்கள் சாதி மக்களிடம் பரப்பி வருகின்றனர்.

ஏதுமறியா அப்பாவி மக்களும் இத்தகையோரின் தவறான வழிகாட்டுதலுக்குப் பலியாகி, கல்விக்கு வழிகாட்டிய மகாத்மா ஜோதிராவ் புலேவையும், பெரியாரையும், அம்பேத்கரையும், ஆனைமுத்துவையும் தலைவர்களாக ஏற்றுக் கொள்வதற்குப் பதிலாக, வன்மத்துக்கும், வன்முறைக்கும் வழிகாட்டும் பசும்பொன்களையும், காடுவெட்டிகளையும், சந்தனக் கட்டைகளையும் தலைவர்களாக ஏற்றுக்கொண்டு, கையில் பேனா பிடிப்பதற்குப் பதிலாக அருவாவைப் பிடித்துக் கொண்டுத் திரிகின்றனர். போதாக்குறைக்கு இப்போது 'காவி' சூலத்தையும் கையில் எடுத்துக் கொண்டனர்.

எனவே, இன்றைய சூழலில் தகுதி திறமை என்பதிலும் மோசடி நடக்கிறது. வகுப்புவாரித் தொகுப்பில் போனாலும் சாதியக் கசடு வழிகிறது. வேறு என்ன செய்ய?

சாதிவாரிப் பங்கீடு நோக்கித்தானோ? அடுத்து பார்ப்போம்.

தொடரும்

ஊரான்

தொடர்புடைய பதிவுகள்

பிற்படுத்தப் பட்டோருக்கான இடஒதுக்கீடு: அம்பேத்கர் துரோகம் இழைத்தாரா? - 5

பிற்பட்டோர் இடஒதுக்கீடு: பிராமண மாணவர்களுக்காக கவலைப்பட்ட மொரார்ஜி தேசாய்! - 6

OBC இட ஒதுக்கீடு: ஒற்றை நாடி மனிதனின் ஓயாத உழைப்பு! - 7

மண்டல் குழுவின் பரிந்துரைகள்! - 8

பிற்படுத்தப்பட்டோரின் எதிராளிகள் யார்? - 9

ஏழைகளுக்கு இட ஒதுக்கீடு என்பது சரியா? - 10

இந்தியாவில் இட ஒதுக்கீடு பெறுபவர்கள் யார்? யார்? -11

வகுப்புவாரியிலிருந்து சாதிவாரியை நோக்கி.. - 13

அலுவலகங்களில் நிலவும் சாதிய முரண்கள்! - 14

Tuesday, December 17, 2024

அலுவலகங்களில் நிலவும் சாதிய முரண்கள்! - 14

அலுவலகங்களில் நிலவும் சாதிய முரண்கள்

1978 ஆம் ஆண்டு தமிழ்நாட்டில் மூன்றாண்டு பொறியியல் பட்டயப் (Engineering Diplamo) படிப்பை முடித்தபோது, இரு எழுத்துத் தேர்வுகளை நடத்தி 500 பேரை திருச்சி பாரத மிகு மின் நிறுவனம்

(BHEL) தேர்வு செய்தது. இதில் நானும் ஒருவன். ஆண்டுக்கு 200 பேர் வீதம் அவர்களுக்கு ஓராண்டு தொழிற் பழகுநர் (Technician Apprentice) பயிற்சி கொடுத்து இறுதியாக ஒரு நேர்முகத் தேர்வு வைத்து அவர்களை பொறுப்பாளர் (Chargeman) பதவியில் அமர்த்தியது நிர்வாகம்.

அப்பொழுது பட்டியல் சாதியினருக்கு மட்டுமே நடுவண் அரசு பொதுத்துறைகளில் இட ஒதுக்கீடு இருந்ததனால், மிகக் குறைந்த எண்ணிக்கையில் இருந்த பட்டியல் மற்றும் பழங்குடி சாதியினர் அனைவருமே மூன்றாவது தொகுப்பில் (Technician Apprentice III Batch) சேர்த்துக் கொள்ளப்பட்டனர். அதற்கடுத்த நான்காவது தொகுப்பில் (IV Batch) பார்ப்பனர் உள்ளிட்ட உயர்சாதியினர் மற்றும் இதர பிற்படுத்தப்பட்டச் சாதியினர் (FC and OBC) மட்டுமே இருந்தனர்.

அரசின் பல்வேறு நிறுவனங்களில், வேலைக்குச் சேர்ந்த புதிதில் சாதிகளை மறந்து நண்பர்களாக மட்டுமே பழகி வந்தவர்களுக்கு, ஆலையில் அடுத்தடுத்து சந்தித்த பதவி உயர்வுகளின் போது, தொழிலாளர்கள், மேற்பார்வையாளர்கள், அதிகாரிகள் என எல்லா நிலைகளிலும் அவர்களுக்குள் மறைந்திருந்த சாதி வெளிக்காட்டத் தொடங்கியது. பதவி உயர்வு கிடைக்காதவர்களுக்கு, பதவி உயர்வு பெற்றவர்களின் மீதான காழ்ப்பாக, அதிலும் குறிப்பாக தாழ்த்தப்பட்டவர்கள் மீதான வெறுப்பாக அது மாறியது.

வேலை வாய்ப்பிலும், பதவி உயர்விலும் தாழ்த்தப்பட்டவர்களுக்கு இட ஒதுக்கீடு அளிக்க வேண்டும் என்று அன்றே சட்டம் இருந்தது. அதனால் அவர்கள் பதவி உயர்வு பெறுவது நீதியானது, சட்டப்படியானது. அது தவிர்க்க முடியாதது. அதே போல பிற்படுத்தப்பட்டவர்களுக்கும் இட ஒதுக்கீடு இருந்திருந்தால் அவர்களுக்குரிய விகிதாச்சாரப் பங்கீட்டைப் பெற்றிருக்க முடியும் என்றல்லவா இவர்கள் சிந்தித்திருக்க வேண்டும்?

நான் ஏற்கனவே குறிப்பிட்டதைப்போல பிற்படுத்தப்பட்டவர்களுக்கும், இட ஒதுக்கீடு பெறுவதற்கான வாய்ப்புகளை இந்திய அரசமைப்புச் சட்டத்திலேயே அம்பேத்கர் அவர்கள் உறுதி செய்திருந்த போதும், அதை நடைமுறைப்படுத்தாத அரசாங்கத்தின் மீது கோபப்படுவதற்குப் பதிலாகத் தாழ்த்தப்பட்டவர்களுக்கு எதிரானக் கோபமாகச் சிலரால் அது மடை மாற்றப்பட்டுவிட்டது.

இதில் கொடுமை என்னவென்றால், பிற்படுத்தப்பட்டவர்களுக்கு இட ஒதுக்கீடு பெறுவதற்குச் சட்ட உரிமை வழங்கிய அம்பேத்கரையே தங்களுக்கு எதிரானத் தலைவராகச் சித்தரித்ததுதான். மண்டல் குழு அமலுக்கு வந்த பிறகும் தாழ்த்தப்பட்டோர் மீதான காழ்ப்பு மனநிலைதான் இன்றுவரை பிற சாதிக்காரர்களிடம் நீடிக்கிறது.

தொழிலாளர்கள் மேற்பார்வையாளர்கள் அதிகாரிகள் என ஒவ்வொரு மட்டத்திலும் இத்தகையப் போக்கே நிலவியது; இன்றும் அதுவே தொடர்கிறது.

இதன் விளைவாக, அரசு நிறுவனங்களில் அதுவரை ஒற்றுமையாய் இருந்த ஊழியர்களும், தொழிலாளர்களும், சாதி அடிப்படையில் பிளவு பட்டனர். தாழ்த்தப்பட்டவர்கள் தங்களுக்கென தனி சங்கங்களையும், பிற்படுத்தப்பட்டவர்கள் தங்களுக்கென தனி சங்கங்களையும் அமைத்துக் கொண்டனர். ஒற்றுமையாக ஒன்றிணைந்து போராட வேண்டிய ஆற்றலை இவர்களே சிதைத்துக் கொண்டதால் அது நிர்வாகத்திற்கு மட்டுமே சாதகமாய் அமைந்து போனது.

***

SC, ST மற்றும் OBC என வகுப்பு வாரியாக ஊழியர்கள் பிளவு பட்டுப் போனாலும், ஒவ்வொரு வகுப்புக்குள்ளும் பல்வேறு சாதிகள் இருப்பதால், பதவி உயர்வு உள்ளிட்ட சிலவற்றைப் பெறுவதில் இவர்களுக்குள்ளேயே சாதிய அடிப்படையில் முட்டி மோதிக் கொள்ளும் நிலையும் உருவானது.

இது குறித்து அடுத்து பார்ப்போம்.

தொடரும்

ஊரான்

தொடர்புடைய பதிவுகள்

பிற்படுத்தப் பட்டோருக்கான இடஒதுக்கீடு: அம்பேத்கர் துரோகம் இழைத்தாரா? - 5

பிற்பட்டோர் இடஒதுக்கீடு: பிராமண மாணவர்களுக்காக கவலைப்பட்ட மொரார்ஜி தேசாய்! - 6

OBC இட ஒதுக்கீடு: ஒற்றை நாடி மனிதனின் ஓயாத உழைப்பு! - 7

மண்டல் குழுவின் பரிந்துரைகள்! - 8

பிற்படுத்தப்பட்டோரின் எதிராளிகள் யார்? - 9

ஏழைகளுக்கு இட ஒதுக்கீடு என்பது சரியா? - 10

இந்தியாவில் இட ஒதுக்கீடு பெறுபவர்கள் யார்? யார்? -11

வகுப்புவாரியிலிருந்து சாதிவாரியை நோக்கி.. - 13

Monday, December 16, 2024

வகுப்புவாரியிலிருந்து சாதிவாரியை நோக்கி.. - 13

வகுப்புவாரியிலிருந்து சாதிவாரியை நோக்கி..

இந்தத் தொடரின் முதல் பகுதியில் குறிப்பிட்டதைப் போல,

தமிழ் நாட்டில், அருந்ததியருக்குத் தனி உள் ஒதுக்கீடு வழங்கியதற்கு எதிரான பள்ளர், பறையர் சாதி மக்களின் கோபம்,

மிகவும் பிற்படுத்தப்பட்ட பிரிவிலிருந்து (MBC) வன்னியர்களுக்கு என தனி உள் ஒதுக்கீடு கோரிக்கைக்கு எதிரான மிகவும் பிற்படுத்தப்பட்ட பிற சாதி மக்களின் கோபம்,

மத்திய அரசுப் பணிகளில் பார்ப்பனர் உள்ளிட்ட உயர் சாதியினருக்கு வழங்கப்பட்ட தனி EWS ஒதுக்கீட்டுக்கு எதிரான தாழ்த்தப்பட்ட, பிற்படுத்தப்பட்ட சாதி மக்களின் கோபம்,

மேலும்,

கர்நாடகாவில் பிற்படுத்தப்பட்டோர் பட்டியலில் உள்ள பஞ்சமசாலி லிங்காயத்துகள் தங்களுக்குத் தனி ஒடுக்கீடு கோரி,

மகாராஷ்டிராவில் மராத்தாக்களுக்குத் தனி ஒதுக்கீடு கோரி,

ஹரியானா உள்ளிட்ட வட மாநிலங்களில் ஜாட்டுகளுக்குத் தனி ஒதுக்கீடு கோரி,

என நாடெங்கிலும் ஒவ்வொரு சாதியினரும் போராட்டங்களை நடத்தி வருகின்றனர்.

தற்போது இந்தியாவில் உள்ள எல்லாச் சாதியினரும், வகுப்புவாரி அடிப்படையிலும், EWS அடிப்படையிலும் இட ஒதுக்கீடு

பெற்று வரும் சூழலில், எதற்காகத் தற்போது ஒவ்வொரு சாதியினரும் தங்களுக்கு எனத் தனி ஒதுக்கீடு கேட்டுப் போராடுகின்றனர்?

ஏற்கனவே நாம் குறிப்பிட்டதைப் போல கல்வியிலும் பொருளாதாரத்திலும் சமுதாய அளவிலும் சாதிகளுக்கிடையில் சமனற்ற நிலையே இன்றும் நீடிக்கிறது.

எடுத்துக்காட்டாக, தமிழ்நாட்டில் மிகவும் பிற்படுத்தப்பட்ட பட்டியலில் (MBC) உள்ள கள்ளர், மறவர், வன்னியர் போன்ற சாதிகளோடு ஒப்பிடும் பொழுது நாவிதர், வண்ணார், குறவர், ஒட்டர் போன்ற சாதிகளின் கல்வி பொருளாதார சமூகநிலையும் சமமானதல்ல. இவர்கள் அனைவரையும் ஒரே தொகுப்பில் வைத்திருப்பதால், இந்தத் தொகுப்பிலேயே உள்ள மிகவும் கீழ்நிலையில் உள்ள நாவிதர், வண்ணார், குறவர், ஒட்டர் போன்ற சாதிகளுக்கான வாய்ப்பு மிகவும் குறைவாகவே இருக்கும்.

அதேபோல, மத்திய அரசின் இதர பிற்படுத்தப்பட்டோர் பட்டியலில் (OBC) உள்ள கொங்கு வெள்ளாளர், நாயுடு, ரெட்டி, முதலியார், வன்னியர், கள்ளர், மறவர் போன்றச் சாதிகளின் கல்வி பொருளாதார சமூக நிலையும் சமமானதல்ல. கொங்கு வெள்ளாளர், முதலியார் ஆகியச் சாதிகளோடு ஒப்பிடும் போது வன்னியர்களுக்கான வாய்ப்பும்; நாயுடு, ரெட்டி போன்றச் சாதிகளோடு ஒப்பிடும் பொழுது கள்ளர், மறவர் சாதிகளுக்கான வாய்ப்பும் மிகவும் குறைவாகவே இருக்கும்.

பட்டியல் சாதி வகுப்பில் உள்ள பள்ளர், பறையர், அருந்ததியர் ஆகிய மூன்று சாதிகளும் கல்வி பொருளாதார சமூக நிலையில் சமமாக இல்லை. விகிதாச்சார அடிப்படையில் தங்களுக்கு உரிய பங்கைப் பட்டியல் வகுப்பிலிருந்து

அருந்ததியர்களால் பெற முடிவில்லை. ஆகையால்தான் அவர்களுக்குத் தனி ஒதுக்கீடு வழங்கப்பட்டுள்ளது.

அருந்ததியர்கூட தனி ஒரு சாதி அல்ல. அதுவும் சில சாதிகளை உள்ளடக்கிய ஒரு வகுப்புதான் (Category). உள் ஒதுக்கீடு வந்த பிறகு, அருந்ததியர் சாதிகளுக்குள் இட ஒதுக்கீடு குறித்து இப்போதைக்குப் பிரச்சனை எதுவும் எழவில்லை என்றாலும் எதிர்காலத்தில் இவர்களுக்கிடையில்கூட, இட ஒதுக்கீடு தொடர்பாகப் பிரச்சனைகள் வரக்கூடும்.

அப்படியானால், வகுப்புவாரி விதாச்சாரப் பிரதிநிதித்துவ கோரிக்கை (Class based reservation) என்பது, சாதிவாரி விகிதாச்சாரப் பிரதிநிதித்துவக் கோரிக்கையாக

(Caste based reservation) உருவெடுத்து வருகிறதோ என்றுதான் எண்ணத் தோன்றுகிறது.

அலுவலகங்களில் நிலவும் சாதிய முரண்கள் குறித்து அடுத்து பார்ப்போம்.

தொடரும்

ஊரான்

தொடர்புடைய பதிவுகள்

பிற்படுத்தப் பட்டோருக்கான இடஒதுக்கீடு: அம்பேத்கர் துரோகம் இழைத்தாரா? - 5

பிற்பட்டோர் இடஒதுக்கீடு: பிராமண மாணவர்களுக்காக கவலைப்பட்ட மொரார்ஜி தேசாய்! - 6

OBC இட ஒதுக்கீடு: ஒற்றை நாடி மனிதனின் ஓயாத உழைப்பு! - 7

மண்டல் குழுவின் பரிந்துரைகள்! - 8

பிற்படுத்தப்பட்டோரின் எதிராளிகள் யார்? - 9

ஏழைகளுக்கு இட ஒதுக்கீடு என்பது சரியா? - 10

இந்தியாவில் இட ஒதுக்கீடு பெறுபவர்கள் யார்? யார்? -11

Saturday, December 14, 2024

இந்தியாவில் இட ஒதுக்கீடு பெறுபவர்கள் யார்? யார்? -11

தமிழ்நாடு அரசு வழங்கும் இட ஒதுக்கீடு

தமிழ்நாட்டில், கல்வி மற்றும் வேலை வாய்ப்புகளில் பிற்படுத்தப்பட்ட வகுப்பு (BC), பிற்படுத்தப்பட்ட வகுப்பு-முஸ்லிம் (BC-M), மிகவும் பிற்படுத்தப்பட்ட வகுப்பு (MBC) என மூன்றாகப் பகுக்கப்பட்டுள்ளன.

இவர்களுக்கு முறையே

BC=26.5%,

BC-M=3.5% (உள் ஒதுக்கீடு),

MBC=20% என

ஆக மொத்தம் 50% இட ஒதுக்கீடு வழங்கப்படுகிறது.

அதே போல பட்டியல் சாதி (SC), பட்டியல் சாதி அருந்ததியர் (SC-A), மற்றும் பழங்குடியினர் (ST) என தாழ்த்தப்பட்டோருக்கான இட ஒதுக்கீடு மூன்று வகுப்புகளாக பகுக்கப்பட்டுள்ளன.

இவர்களுக்கு முறையே

SC=15%,

SC-A=3% (உள் ஒதுக்கீடு),

ST=1% என

ஆக மொத்தம் 19% இட ஒதுக்கீடு வழங்கப்படுகிறது.

ஒட்டுமொத்தமாக தமிழ்நாட்டில் 69% இட ஒதுக்கீடு சட்டபூர்வமாகவே வழங்கப்படுகிறது.

தமிழ் நாடு இட ஒதுக்கீடு

மண்டல் குழு பரிந்துரைகளின் படி தமிழ் நாட்டில் பயன் பெறுவோர் யார்? யார்?

மண்டல் குழு பரிந்துரைகளின்படி மத்திய அரசு வேலைகளில் 27% இட ஒதுக்கீடு வாய்ப்பைப் பயன்படுத்துவதற்குத் தகுதியுள்ளவை என தமிழ்நாட்டில் மட்டும்,

ஆச்சாரி, அகமுடையர், அம்மட்டன், ஒட்டர், தாழ்த்தப்பட்ட வகுப்பு கிறித்தவர், தேவாங்கர், இடையர், வடுகர், இல்லத்து பிள்ளைமார், இசை வேளாளர், செங்குந்தர், கள்ளர், கம்மாளர், கருணீகர், தேவர், கொங்கு வேளாளர், குரும்பர், குறவர், லப்பை முஸ்லீம், லம்பாடி, லத்தின் கத்தோலிக்கர், நாவிதர், மறவர், மீனவர், முத்துராஜா, சாணார், நாய்க்கர், நரிக்குறவர், ஒட்டர், தெலுங்குச் செட்டி, சேனைத் தலைவர், சௌராஷ்டிரா, சோழிய வேளாளர், தேவர், தொட்டி நாயக்கர், ஊராளிக் கவுண்டர், வாணியச் செட்டியார், வண்ணான், வன்னிய குல சத்திரியர், வேடர், வேட்டுவக் கவுண்டர், ஒக்கலிகர், இடையர்

உள்ளிட்ட 288 சாதிகள் இதர பிற்படுத்தப்பட்டோர் பட்டியலில் (OBC) இடம் பெற்றுள்ளன.

நடுவண் அரசு இட ஒதுக்கீடு

அதே வேளையில், மத்திய அரசுப் பணிகளில் இது

OBC=27%,

SC=15%,

ST=7.5% என ஆக மொத்தம் 49.5% இட ஒதுக்கீடு வழங்கப்படுகிறது.

மீதி 50.5% அனைவருக்குமான பொதுப் பட்டியலாகும். இதை பயன்படுத்திக் கொண்டுதான் பார்ப்பனர்கள் உள்ளிட்ட உயர் சாதியினர் நடுவண் அரசின் கல்வி மற்றும் வேலை வாய்ப்புகளில்

பெருமளவு இடத்தைக் கைப்பற்றிக் கொள்கின்றனர். தற்போது இந்த 50.5% இல் EWS என்ற பெயரில் சொளையாக 10 சதவீத்தைத் தட்டிச் செல்கின்றனர்.

'கிரீமி லேயர்' (Creamy Layer)

ஆண்டுக்கு ரூபாய் 8 லட்சத்துக்கு மேல் வருமானம் ஈட்டும் பிற்படுத்தப்பட்ட வகுப்பைச் சார்ந்தவர்களுக்கு, இட ஒதுக்கீட்டு சலுகைகளைப் பெற உரிமை கிடையாது என்பதுதான் இந்தக் கிரீமி லேயர் ஏற்பாடு. இதனால் பிற்படுத்தப்பட்ட வகுப்பில் ரூபாய் 8 லட்சத்திற்கும் கீழ் வருவாய் உள்ளவர்கள், ஏழைகள் பயன்பெற இது உதவும் என்று ஒருவர் கருதக் கூடும். ஆனால், இந்த வரையறையின்படி பொருத்தமான நபர்கள் இல்லை என்றால் பிற்படுத்தப்பட்ட வகுப்பில் நிரப்பப்படாத இடங்கள், மூன்று ஆண்டுகள் கழித்துப் பொதுப்பட்டியலில் சேர்க்கப்பட்டு, அதையும் உயர் சாதியினரே அபகரித்துக் கொள்ளும் ஆபத்துதான் உள்ளது.

ஒருவன் ஏழையா என்று பார்ப்பதைவிட அவன் சமூகத்தில் (socially) பிறரால் எவ்வாறு நடத்தப்படுகிறான் என்பதை அளவுகோளாக வைத்துதான் அவனுக்கு இட ஒதுக்கீடு வழங்குவது குறித்து பரிசீலிக்க வேண்டும். உயர்சாதிகளில் உள்ள ஏழைகளை ஒப்பிடும் பொழுது SC, ST & OBC பிரிவிகளில் உள்ள மக்கள் சமூக ரீதியாக மிகவும் கீழான நிலையில்தான் உள்ளனர்.

SC, ST & OBC மக்களின் நிலையை முன்னேற்ற வேண்டும் என்று சொன்னால், சட்டத்தை இயற்றவும், திட்டங்களை வகுக்கவும், இவற்றை நடைமுறைப் படுத்தவும் அதிகாரம் கொண்ட IAS, IPS, அரசின் உயர் மட்டச் செயலாளர்கள், மந்திரிகள், நீதித்துறை, IIT, IIM போன்ற உயர் கல்வி நிறுவனங்களின் தலைமைப் பொறுப்புகள், பேராசிரியர்கள் உள்ளிட்ட இடங்களில் ஒடுக்கப்பட்ட மக்களின் வலிகளை உணர்ந்த SC, ST & OBC பிரிவைச் சேர்ந்தவர்கள் அதிகமாக இடம் பெற வேண்டும்.

இந்தக் கிரீமி லேயர், பிற்படுத்தப்பட்ட மக்களின் வேலை வாய்ப்புகளில் மட்டுமல்ல அவர்களின் பதவி உயர்வுகளிலும், அதேபோல SC, ST ஊழியர்களின் பதவி உயர்வுகளிலும் கடைபிடிக்கப்படுகிறது.

அதனால், SC, ST & OBC மக்கள் இட ஒதுக்கீடு மூலம் அரசு வேலைகளில் பணிக்குச் சேர்ந்தாலும், மேற்கண்ட கிரீமி லேயர் முறையால் அவர்கள் கீழ்மட்ட (C&D) ஊழியராகவே பணியாற்றி ஓய்வு பெற்று விடுவர். பதவி மூப்பின் அடிப்படையில்கூட அவர்கள் ஒருபோதும் மேலே குறிப்பிட்ட உயர் பதவிகளை அடையவே முடியாது.

ஆனால், ஐயகோ! இவற்றில் எல்லாம் இன்னமும்கூட SC, ST & OBC

மக்களின் எந்த ஒரு வலியையும் உணராத பார்ப்பனர்களே ஆதிக்கம் செலுத்தி வருகின்றனரே?

I.I.Tகளில் பார்ப்பனகளின் ஆதிக்கம்

அடுத்து அரியவகை ஏழைகளுக்கான இட ஒதுக்கீடு (EWS) குறித்துப் பார்ப்போம்.

தொடரும்

ஊரான்

தொடர்புடைய பதிவுகள்

பிற்படுத்தப் பட்டோருக்கான இடஒதுக்கீடு: அம்பேத்கர் துரோகம் இழைத்தாரா? - 5

பிற்பட்டோர் இடஒதுக்கீடு: பிராமண மாணவர்களுக்காக கவலைப்பட்ட மொரார்ஜி தேசாய்! - 6

OBC இட ஒதுக்கீடு: ஒற்றை நாடி மனிதனின் ஓயாத உழைப்பு! - 7

மண்டல் குழுவின் பரிந்துரைகள்! - 8

பிற்படுத்தப்பட்டோரின் எதிராளிகள் யார்? - 9

ஏழைகளுக்கு இட ஒதுக்கீடு என்பது சரியா? - 10

அரிய வகை ஏழைகளுக்கு இட ஒதுக்கீடு (EWS) - 12

அரிய வகை ஏழைகளுக்கு இட ஒதுக்கீடு (EWS)

பிற்படுத்தப்பட்ட வகுப்பினருக்கு (any backward class) மட்டும்தான் இட ஒதுக்கீடு வழங்க வேண்டும் என இந்திய அரசமைப்புச் சட்டம் பிரிவு 15(4) மற்றும் 16(4) வழிவகை செய்கிறது. இங்கே அரசமைப்புச் சட்டம் குறிப்பிடும் any backward class என்பது SC, ST & OBC பிரிவினரை மட்டுமே குறிக்கும்.

மேற்கண்ட சட்டப்பிரிவுகளின்படி, பிற்பட்ட வகுப்பு என்பதன் பொருள் சமூகத்திலும், கல்வியிலும் (socially and educationally backward) பின்தங்கிய பிரிவு மக்களைக் குறிப்பதாகும். இந்த வரையறைக்குள் வராத, பொருளாதாரத்தில் மட்டும் பின்தங்கியவர்கள் என்கிற அடிப்படையில் இட ஒதுக்கீடு கொடுப்பது என்பது சட்டத்திற்கும், சமூக நீதிக் கொள்கைக்கும் எதிரானது.

அரசமைப்புச் சட்டத்தின் அடிப்படை கோட்பாடுகளுக்கு எதிராக 2019 ஆம் ஆண்டு, 103 வது சட்ட திருத்தத்தைக் கொண்டு வந்து, அரசமைப்புச் சட்டத்தில் 15(6), 16(6) ஆகியப் பிரிவுகளைப் புகுத்தி, ஆண்டுக்கு ரூபாய் 8 லட்சம் வரை சம்பாதிக்கின்ற பார்ப்பனர்கள் உள்ளிட்ட உயர் சாதியினருக்கு, பொருளாதார ரீதியாக பலவீனமான பிரிவினர் (EWS) என்று நாமகரணம் சூட்டி, 10% தனி இட ஒதுக்கீடு வழங்கியுள்ளது மோடி அரசு.

ரூபாய் 8 லட்சம் சம்பாதிக்கிறவன் பொருளாதாரத்தில் பலவீனமானவனாம்? கணக்குல அந்த சாணக்கியனையே மிஞ்சிட்டானுங்க! இருக்காதா பின்ன? சாணக்கியனின் வாரிசுகள்தானே இவர்கள்?

பார்ப்பனர்களால் நிரம்பி வழியும் உச்ச நீதிமன்றமும், இந்த ஒதுக்கீடு அரசியல் சட்டப்படி செல்லுபடியாகும் என்று உறுதி செய்து கொண்டது. குற்றவாளியே தனக்கான தீர்ப்பை எழுதிக் கொள்வது என்பது இதுதானோ?

இந்த EWS இட ஒதுக்கீடு என்பது ஏதோ மத்திய அரசு கல்வி மற்றும் வேலை வாய்ப்புகளில் மட்டும் என்று கருதி விட வேண்டாம்.

SC, ST & OBC பிரிவு மக்களுக்குத் தனியார் கல்வி நிறுவனங்களில் இட ஒதுக்கீடு இல்லாத போது, EWS இன் கீழ் வரும் பார்ப்பனர்களுக்குத் தனியார் கல்வி நிறுவனங்களிலும் இட ஒதுக்கீடு பெற வழிவகை செய்துள்ளது இந்தச் சட்டத் திருத்தம்.

கிட்டத்தட்ட 40 ஆண்டுகளாக, பல வட மாநிலங்களில் பிற்படுத்தப்பட்டோருக்கு இட ஒதுக்கீடே இல்லாதிருந்த போது, வாய் பொத்திக் கொண்டிருந்த வட மாநில ஆட்சியாளர்கள், இன்று மாநில அரசின் கல்வி மற்றும் வேலை வாய்ப்புகளிலும்கூட இந்த 10% இட ஒதுக்கீட்டை பார்ப்பனர்களுக்கு அள்ளிக் கொடுக்கத் தயாராகி விட்டனர். ஏமாந்த சோணகிரிகள் இருக்கும்வரை பார்ப்பனர்கள் நமது தலையில் ஏறி மிளகாய் அரைப்பதை யாரால்தான் தடுக்க முடியும்?

அன்று மண்டல் குழு பரிந்துரையை அமல்படுத்துவதற்கு எதிராகச் செயல்பட்ட இந்தியப் பொதுவுடமைக் கட்சி (மார்க்சிஸ்ட்), இன்று பார்ப்பனர்களுக்கான EWS இட ஒதுக்கீட்டை ஆதரித்து வாக்களித்ததன் மூலம், கம்யூனிஸ்டுகளின் மீது கரும்புள்ளியைக் குத்திவிட்டனர்.

மேற்கண்ட 10% இட ஒதுக்கீட்டின் மூலம், இன்று மொத்த இட ஒதுக்கீடு 59.5% ஆக உயர்ந்துள்ளது. இட ஒதுக்கீடு 50 சதவீதத்துக்கு மேல் இருக்கக் கூடாது என்று உச்ச நீதிமன்றம் சொன்ன வரையறை இன்று காற்றில் பறக்கிறது.

மண்டல் குழு பரிந்துரையின்படி, அன்று பிற்படுத்தப்பட்டோருக்கு இட ஒதுக்கீடு வழங்க ஆணை பிறப்பித்த போது, ஒட்டுமொத்த பார்ப்பனர்கள் உள்ளிட்ட உயர்சாதிக் கூட்டம், நாட்டில் மிகப்பெரியக் கலவரத்தை உண்டு பண்ணியது. ஆனால் இன்று, EWS இட ஒதுக்கீடு மூலம் SC/ST/OBC மக்களுக்கான வாய்ப்புத் தட்டிப் பறிக்கப்பட்ட போதும் நமது மக்கள் மௌனம் காத்தனர். இந்த மௌனம்தான் பார்ப்பனர்கள் நம்மை ஏறி மிதிப்பதற்கு அடிப்படை.

பூரி ஜெகன்நாதர் கோயிலில் பிரகாரத்திற்கு வெளியே திண்ணைமேல் உட்கார்ந்து கொண்டு, பிற்படுத்தப்பட்ட சூத்திர சாதி பக்தர்களின் தலையைத் தங்களது கால் பாதத்தால் தொட்டு பார்ப்பன புரோகிதர்கள் ஆசீர்வாதம் செய்யும் காட்சிதான் இங்கே என் நினைவுக்கு வருகிறது.

EWS இட ஒதுக்கீடு நீதியா? அநீதியா?

இதில் கொடுமை என்னவென்றால், இந்திய அளவில் 52% உள்ள பிற்படுத்தப்பட்டோருக்கு 27% மட்டும்தான் இட ஒதுக்கீடு தரப்பட்டுள்ளது. ஆனால், பட்டியல்-பழங்குடி-இதர பிற்படுத்தப்பட்டோர் (SC/ST/OBC) நீங்கலாக, ஐந்து சதவீதத்திற்கும் குறைவாக உள்ள பார்ப்பனர்கள் உள்ளிட்ட உயர் சாதியினருக்கு 10% இட ஒதுக்கீடு வழங்கப்பட்டுள்ளது. இது வகுப்புவாரி விகிதாச்சார பங்கீட்டுக்கு விரோதமானது.

SC/ST/OBC பிரிவினருக்கு ஏற்கனவே உள்ள 49.5% போக, மீதமுள்ள 50.5%

எனும் பொதுப் பிரிவிலும் SC/ST/OBC மக்கள் போட்டியிட முடியும். ஆனால் தற்பொழுது EWS என்ற பெயரில் 50.5% லிருந்து 10 சதவீதத்தை அவாள்கள் அபகரித்துக் கொண்டதால், SC/ST/OBC பிரிவினருக்குப் பொதுப்பட்டியலில் இருந்த வாய்ப்பு 50.5% லிருந்து 40.5% ஆக குறைந்து போனது. அதாவது, நமது மக்கள் பொதுப்பட்டியலில் 10 சதவீதத்தை இழந்து விட்டனர்.

ஆனால் பார்ப்பனர் உள்ளிட்ட உயர் சாதியினருக்கு EWS என 10% தனியாகவும், பொதுப்பட்டியலில் 40.5% என அதே 50.5% வாய்ப்பும் தொடர்கிறது. எனவே, EWS ஒதுக்கீடு என்பது SC/ST/OBC மக்களுக்குப் பொதுப்பட்டியலில் இருந்த வாய்ப்பைத் தட்டிப் பறித்து, சமூக நீதிக் கோட்பாட்டுக்கு இழைத்த அநீதியாகும்.

இந்த அநீதிக்கு ஆதரவாய் நின்று நாடாளுமன்றத்தில் முழங்கியவர் சிபிஐ (எம்) ஐச் சார்ந்த 'தோழர்' டி.கே.ரங்கராஜன் அவர்கள்.

***

ஆக, இன்றைய தேதியில் பட்டியல் சாதி (SC), பழங்குடியினர் (ST), இதர பிற்படுத்தப்பட்டோர் (OBC), பார்ப்பனர் உள்ளிட்ட உயர் சாதியினர் (EWS) என அனைத்து சாதியினருமே இட ஒதுக்கீடு பெறுவதற்கான உரிமையைப் பெற்று விட்டனர். பார்ப்பனர் மொழியில் சொல்ல வேண்டுமென்றால், இன்று கல்வியிலும் வேலை வாய்ப்புகளிலும் உள்ளே நுழைபவர்கள் அனைவருமே 'கோட்டா' தான்.

இப்படி எல்லாச் சாதியினருமே, இட ஒதுக்கீடு வாய்ப்புகளைப் பெறும் பொழுது, அவர்களுக்குள் இன்று முரண்களும் மோதல்களும் ஏன் வெடித்துக் கிளம்புகின்றன?

இட ஒதுக்கீடு கோட்பாடானது வகுப்புவாரி பிரதிநிதித்துவத்திலிருந்து, சாதிவாரி பிரதிநிதித்துவத்தை நோக்கி நகர்கிறதா? அடுத்து பார்ப்போம்.

தொடரும்

ஊரான்

தொடர்புடைய பதிவுகள்